Kárta čájeha Árvvoštallojuvvon Riehttejávrri suodjalanguovllu guhkkodaga.
(Gáldu: NINA)
Riehttejávri lea okta 20 jeagge- ja njeaššeguovlluin Finnmárkkus máid NINA čielggadii Finnmárkku Filkkamánni ovddas 2005:s. Maŋŋel jođánis ja unnan čielggadeami veardádallojuvvui guovllu árvu dušše báikkalaš dásis, mii ii atte vuođu suodjalit nášuvnnalaš suodjalanplánaid vuođul. Guovlu máid Filkkamánni lei dáhtton čielggadit, lea 5,8 km
2 viidosaš ja lea sullii gasku Biedjovákki ja Máze, 20 km luottas eret (go mihtiduvvo áimmu mielde).
Suodjalanárvvut
NINA-čielggadeaddjit eai bállen nu vuđolaččát doaimmahit bargguideaset heajos dálkki dihte, muhte dás bájuhit dan dehálepmosa mii čállui Riehttejávrri birra
NINA rápportas:
Oanehis áiggis máid leimmet doppe registrereimmet sihke njuvčča ja čuotnjaga Lovpárjávrris. Guovllus leat gaskageardán ollu lottit. Eanemus loddešlájat ledje ruonájuolčoavžžu, čáhppesčoavžžu, bižus, unna guškkastat ja meahkástat. Eanemus lottiid oinniimet Lovpárjávrri birra. Jeaggemeahkástat, čáhppesčoavjeviroš, biekčavuojaš, bávgoš ja njukča monnejit doppe.
Lottiid orrunbáiki dán guovllu njeaššis sulástahttá guovlluin máid suotnjočovžoš geavaha eará sajiin suohkanis, muhte vaikke jagis 1999:s guorahallui vuđolaččát, de dát rukseslistoloddi ii oidnon.
Plánas lei čielggadit guovllu maiddái botanalaččát, muhte dan birra ii leat mihkege rápportas.
Min dieđus ii leat kártejuvvon guovllu geavaheapmi, ii histurjjálaččát, ii ge ođđáset áiggi geavaheamis.
Gáldut
Bjerke/Strann/Johnsen: Naturfaglig kartlegging av 20 områder i forbindelse med verneplan for myrer og våtmarker i Finnmark. NINA 2005