Guovdageainnu meahcceguovddáš / natursenter

På norsk

Biedjovággi – ruvkedoaimma ovdal, vuolde ja maŋŋil

16 – Ruvkke ođđasit álggaheapmi?

Maŋŋil ruvkke heaittiheami 1991:s massii Outokumpu beroštumi Biedjovággái. Liikkáge jotke ohcamiid viidáseappot, ja ovtta gaska ozai norgga fitnodat Geologiske Tjenester (Geologalaš bálvalusat) ovttas kanadalaš fitnodagain Hendricks Minerals:ain. 2006:s osttii ruoŧa fitnodat International Gold Exploration vuoigatvuođaid, ja vuvddii daid viidáseappot 2010:s muhtun eará ruoŧa fitnodahkii, Arctic Gold. Dalle lei veaiki ja golli haddi loktanan garrasit, ja Arctic Gold háliidii fas álggahit ruvkedoaimma. Sii ráhkadahtte plánaprográmma ja šattai stuora digaštallan Guovdageainnus galge go luoitit fitnodaga dohko dehe eai. Dá leat muhtun govat gižžus, mii vuosttain gártái nu ahte suohkansivra 16.12.2013:s biehttaledje plánaprográmma 10 jienain 9 jiena vuostá.

2010:s válddii Arctic Gold badjelasas ohcanvuoigatvuođaid Biedjovákkis ja álggahii dakkaviđe ohcanbohkamiid.
(Govva: Arctic Gold)		 Arctic Gold direktevra lei Lars-Åke Claesson.
(Govva: NRK)		 Johan Klemet Kalstad lei Arctic Gold sámi alibiija nu go sin stivrra várreáirras.
(Govva: Svein Lund)		 Nils Aslak M. Skum barggai ruvkkes doaibmaáigodagaid ja fáktan dalle go ruvke ii lean doaimmas. Álbmotčoahkkimis Arctic Gold plánaid birra váruhii son garrasit álggahit ruvkedoaimma fas. Dás jearahallá NRK su Biedjovákkis 2013:s.
(Govva: Svein Lund)
Suohkanstivračoahkkimis Máze skuvllas 19.03.2012:s digaštallet Biedjovággeášši. Sárdnestuolus Mikkel Isak Eira, áidna suohkanstivraáirasiin gii rievdadii oainnus 2012:s 2013:ai.
(Govva: Oddgeir Isaksen, FD)		 Stuora oassi ávžžuhusdoaimmain miehtat vai vuosttaldit ruvkke álggaheami čađahuvvui namakeahtes plakáhtaid gilvimiin, nu go dáinna.
Sámi joatkka- ja boazodoalloskuvlla oahppit čađahedje guorahallama ohppiid gaskkas mas jerre maid sii oaivvildedje ruvkedoaimma birra Biedjovággái. Dá lea okta dain vástádusain.

Plakáhtta čoahkkinlanja olggobealde suohkanstivračoahkkima vuolde 16.12.2013: "Dá lea min golli."
(Govva: Geir Jørgensen)		 "Giitu go doarjjut boahtteáiggi."
(Govva: Geir Jørgensen)		 "Ráinnas čáhci, luondu, ealáhusat".
(Govva: Geir Jørgensen)
"Min guovllut, eai stáda" ja "Mun ráhkistan luonddu".
(Govva: Geir Jørgensen)		 "Ale leage fillengálvu, jienas ii"
(Govva: Geir Jørgensen)

Suohkanstivračoahkkin 16.12.2013:s gos loahpalaččat biehttaledje Arctic Gold ruvkeplánaide.
(Govva: Geir Jørgensen)		 Čoahkkinjođihanbeavddis ráđđeolmmái Mikkel Ailo Gaup, sátnejođiheaddji Klemet Erland Hætta ja várresátnejođiheaddji Hans Isak Olsen. Sárdnestuolus Johttisápmelaččaid searvvi joavkojođiheaddji Anders S. Buljo.
(Govva: Ovlla Gaup)		 Muhtun suohkanstivraáirasat, gb.: Per Nils Saari (Bb), Inger Marit Bongo (Bb), Ole Magnus Triumf (SáB), Susanne Vars Buljo (SáB), Ellen J. Sara Eira (SáB) ja Johan Anders N. Somby (SáB).
(Govva: Carl-Gøŕan Larsson / NRK)




Ruovttoluotta Biedjovákkegovaid álgosiidui.